““Taliban” Almaniya ilə diplomatik əlaqələr qurmağa ümid edir və Berlindən sağlamlıq, kənd təsərrüfatı və təhsil sahələrində maliyyə yardımı gözləyir”. Moderator.az xəbər verir ki, bunu Almaniyanın “Die Welt” qəzetinə müsahibəsində “Taliban” sözçüsü Zəbihullah Mücahid deyib. Almanların həmişə xoş qarşılandıqlarını söyləyən Mücahid onların təxminən yüz il əvvəl Əfqanıstanda çox yaxşı işlər gördüyünü xatırladıb.

“Taliban” islamçı hərəkatı Almaniyadan diplomatik tanınma və maliyyə yardımı tələb edir. Zəbihullah Mücahid müsahibəsində daha sonra deyib: “Almaniya ilə yaxın və rəsmi diplomatik əlaqələr qurmaq istəyirik. Almanlar Əfqanıstanda həmişə xoş qarşılanırlar. Təxminən yüz il əvvəl Əfqanıstan krallığının mövcud olduğu dövrdə də almanlar Əfqanıstanda çox yaxşılıq etdilər. Təəssüf ki, sonra amerikalılara qoşuldular. Ancaq indi hər şey bağışlandı”.

Mücahid “Taliban”ın Almaniyadan və digər ölkələrdən sağlamlıq, kənd təsərrüfatı və təhsil sahələrində maliyyə dəstəyi, humanitar yardım gözlədiyini və onlarla əməkdaşlığa arxalandığını qeyd edib.

“Die Welt”in yazdığına görə, hərbi təxliyə başa çatdıqdan sonra sığınacaq istəyən əfqanların ölkəni tərk etməsini təmin etməyə çalışdığı üçün Almaniya “Taliban”la danışıqlara getmək məcburiyyətindədir.

Bir neçə gün əvvəl Almaniyanın xarici işlər naziri Hayko Maas “Taliban”la danışıqların lehinə danışmışdı: “Əgər bu siyasi cəhətdən mümkün olsa və təhlükəsizlik vəziyyəti imkan versə, Almaniya yenidən Kabildə səfirliyini açar”. O, diplomatik nümayəndəliyin “Taliban” hökumətinin avtomatik olaraq tanınması demək olmadığını bildirmişdi.

Xatırladaq ki, “Taliban” Kabilə girdikdən sonra Almaniya hökuməti səfirliyi bağladığını elan etmişdi. Almaniyanın Əfqanıstandakı səfiri Markus Potzel islamçılarla danışıqlar aparmaq üçün Dohaya getmişdi. Qəzetin qeyd etdiyi kimi, Qətərin paytaxtında Xarici İşlər Nazirliyinin funksiyalarını yerinə yetirən “Taliban”ın siyasi ofisi yerləşir. Bununla belə, “Taliban”ın ilk nümayəndələri artıq Əfqanıstana qayıdıb. “Die Welt” yazır ki, bu səbəbdən Almaniya hökuməti yeni hökumətlə sıx əlaqə saxlamağın yollarını nəzərdən keçirməyə başlayıb.