Azərbaycanın Milli Qəhrəmanı Maşallah Abdullayev vəfat edib.

Maşallah Abdullayevin onkoloji xəstəlikdən 72 yaşında dünyasını dəyişdiyi bildirilir. Goranboy rayon İcra Hakimiyyətində APA-nın yerli bürosuna verilən məlumata görə, Milli Qəhrəman Maşallah Abdullayev bu gün dəfn ediləcək.

Qeyd edək ki, Abdullayev Maşallah Babakişi oğlu 27 may 1950-ci ildə Qasım İsmayılov (indiki Goranboy) rayonunun Kəpənəkçi kəndində doğulub.

Birinci Qarabağ müharibəsində könüllülərdən ibarət dəstə yaradaraq iştirak edib. Maşallah Abdullayev 1992-ci ildə “Azərbaycanın Milli Qəhrəmanı” adına layiq görülüb.

Briqada komandirinin müavini olub.

1992-1993-cü illərdə Goranboy rayon İcra Hakimiyyətinin başçısı kimi çalışıb. Azərbaycan Respublika Ali Sovetinin deputatı olub.

Azərbaycan Respublikası Müharibə, Əmək və Silahlı Qüvvələr Veteranlar Şurası Goranboy Rayon Şurasının sədri kimi fəaliyyət göstərib.