QARA YAYLIQ
Bir qara dərd var bu dünyada. Qəfil gələn, yatanda yuxumuza belə girməyən, heç düşümədiyimiz, heç qorxmadığımız qara dərd- Şəhid dərdi...
Dağ kimi oğulları orduya yola salan analara , bacılara gələn dərddi bu dərd, elə-obaya, məhlələrərə maşınla gələn   dərdi deyirəm...
Hələ illər öncə doymadığım uşaqlığımı tükürpədici səsi ilə perikdirən, şüvən sala gələn bir maşının bizə Şəhid dərdi gətirdiyi yadımdadır. Hansı ki, həmin gündən anamın qoynu dərdlə dolub-daşdı...
Həmin günü məhləmizin dəmir darvazaları taybatay açılanda,  içimdə  qaranlıqbir boşluğun açıldığını hiss etdim. Bu, qucağımızdakı dərdə qarışan anamın naləsini eşidəndə qopub düşən ürəyimin boş yeriidi...
Sonra zaman keçdi.Bacılarımın, mənim əynimə biçilən  qara dərd qara yaylıq kimi bizi təqib etməyə başladı...
Günlərun birində qara yaylığı açdıq  başımızdan...Anam qara dərdlərimizi qatlayıb qoydu sandığın  uzaq küncünə...
Dərdi paylaşmaq olmur. İtirmək, kimsəyəbağışlamaq olmur. O qapını döydümü? Olur sənin dərdin.Harda istəyirsən saxla- ürəyində,sandığının uzaq küncündə, gözlərinin yaşında...
Anam Vətən! Dərdini anlayıram, dərdin tanış, doğma dərddi...
Mən də sənin bir parçanam.İndi bu gecə nəfəsi kəsilə-kəsilə fəryad qoparan anaların, bacıların daxilində nələr baş verdiyini yaxşı anlayıram...
Qara yaylığa dönən  qara dərdim yanımda... Çiynimə sərilməsə də bu gündən şəhid olan əsgərlərin dərdini təzələdi qara dərdim...
Şəhid dərdi tək çəkilməz...Şərəflidirsə, həm də çox ağırdir.
Canım Anam!Yanındayam,ağlamağa yox dərdini çəkməyə  səninləyəm! Şəhidimə çəkdiyin ah-nalə qara daş olub düşmənin beynini ovub parçalasın!
Canım Anam! Bu həm sənsən, həm Azərbaycan, həm də bu gündən şəhid olan əsgərlərimizin Anaları! Sayımız artmaqdan qoru bizi İlahi bu dərd yetər bizə!
Erməni adlandırdığımız düşmən zaman kecdikcə gözümdə mücərrədləşir. Toyumuzu, sevincimizi, oğlumuzu, qardaşımızı, atamızı, qonşumuzu, ellimizi, hər bir azərbaycanlımızı
əlimizdən alan, bizi Şəhidləşdirən nankorları sən susdur  İlahi!
Şəhidimizi çəkməyə bizə dözüm ver aman Allah, daha səbr istəmirəm...

Səhər Şıxəli
           
           
           шаблоны для dle 11.2