Məlum olduğu kimi, Azərbaycan Prezidenti İlham Əliyev bu gün Birləşmiş Ərəb Əmirliklərinə (BƏƏ) işgüzar səfərə yola düşüb. Eyni zamanda Ermənistanın baş naziri Nikol Paşinyan da BƏƏ-yə səfər edir. Bildirilir ki, səfər çərçivəsində iyulun 10-da Əbu-Dabidə Azərbaycan Respublikasının Prezidenti İlham Əliyev və Ermənistan Respublikasının baş naziri Nikol Paşinyan arasında ikitərəfli görüş keçiriləcək. Bu görüşün regionda sülh prosesinə təkan verəcəyi gözlənilir.

Bəs bu görüşün məhz BƏƏ-də keçirilməsi təsadüfdürmü? 

Mövzu ilə bağlı politoloq Zeynal Əmrəliyev dovrunnabzi.az-a açıqlamasında bildirib ki, görüşün BƏƏ-də keçirilməsi ilk növbədə bu ölkənin uzun müddətdir sərgilədiyi neytral xarici siyasət xətti ilə bağlıdır:
"Bu görüş əsasən BƏƏ-nin neytral mövqeyi ilə izah olunur. Çünki BƏƏ-nin regionda mühüm layihələri var. Buna baxmayaraq, həm Azərbaycan, həm də Ermənistanla neytral münasibətlərə malik ölkədir və Qarabağ məsələsində əvvəldən neytral mövqe sərgiləyən dövlətdir. Yəni BƏƏ həm Azərbaycanla əməkdaşlıq edir, enerji sahəsində çox geniş əməkdaşlığı mövcuddur, həm də son zamanlarda Ermənistana investisiyalar yatırıb.
Həmçinin bir müddət əvvəl BƏƏ-nin xarici işlər naziri həm Azərbaycanın xarici işlər naziri Ceyhun Bayramovla, həm də Ermənistanın XİN rəhbəri Ararat Mirzoyanla telefon danışığı aparmışdı. Bu görüşün keçirilməsi üçün bir neçə şəhər təklif olunmuşdu. Rusiyanın paytaxtı Moskva, Brüssel və Vaşinqtonda keçirilməsi gözlənilirdi. Hətta Astanada keçirilməsi ilə bağlı da təkliflər var idi.
Lakin bu kimi şəhərlər ikitərəfli görüşlərin təşkili üçün müəyyən qədər fikir ayrılığı yaradırdı. Çünki məsələn, Qazaxıstanın Türk Dövlətləri Təşkilatına üzv olması Ermənistanda müəyyən narazılıqlar doğura bilərdi.
Görüşün Moskvada, Vaşinqtonda və ya Brüsseldə keçirilməsi isə ona görə mübahisəli sayılırdı ki, həm Rusiya, həm ABŞ, həm də Avropa İttifaqının bu məsələdə müəyyən maraqları var. Münaqişənin həllində, Azərbaycanla Ermənistan arasında sülh danışıqlarının davam etdirilməsində hər iki ölkə maraqlıdır. Lakin qeyd etdiyim kimi, BƏƏ regionda maraqlı tərəf deyil və hər iki ölkə ilə yaxın münasibətlərə malikdir. Ona görə də hesab edirəm ki, görüşün Əbu-Dabidə təşkili hər iki tərəf üçün sərfəlidir.
Əbu-Dabi təhlükəsizlik baxımından da mühüm əhəmiyyətə malik şəhərdir".шаблоны для dle 11.2